23歲健美運動員Ryan Crowley不幸胸肌肌腱撕裂需做手術留院
近日Ryan 同 Larry 一齊操嘢嘅時候Ryan挑戰推5 餅（220kg）嘅重量，不幸推嘅時候胸肌肌腱撕裂隨即送院，好彩有Larry 同兩邊有人support住如果唔係後果更加嚴重！
健力健美界KOL Larry Wheels除咗一路陪佢送院同做手術外仲幫手發起眾籌，而籌款金額好快達標（USD$25000)，目前已經完成咗四個鐘嘅手術住院休養緊（原本預計手術一個鐘），希望Ryan Crowley能早日康復！
@Burger_kofgym :
「今次嘅意外發生，絕對係無任何人願意見到，尤其是同樣作為訓練者嘅我地更加深深咁明白到用時日用苦心經營返嚟嘅肌肉同力量係珍貴嘅，所以當毀滅性嘅意外出現時，我地會更加有一種切膚之痛，亦為呢位運動員未來嘅比賽仕途感到嘆息
而就住呢次嘅事宜大家係咪就應該更加反思一下，呢一種響網絡上以展示誇張訓練重量去令觀眾留下深刻印象嘅風氣係咪真係好呢，巨大嘅肌肉，誇張嘅力量無疑俾到我地好震撼嘅娛樂，同時網紅又可以得到關注名成利就，但我地會唔會唔記得左其實我地訓練嘅目的唔係為左表演，我地嘅訓練正正係有目的就係要成就我地嘅目標，健美運動員針對肌肉嘅訓練係為左贏健美冠軍，健力同舉重運動員精準對重量訓練嘅計算係為左自己響賽事突破個人以及級別紀錄，就算大力士比賽亦同樣，但為左唔係以上嘅理由而挑戰一個完全唔確定自己有無能力並唔係屬於自己訓練目的嘅重量動作，因而受傷係完全不值得
你可能會話我地香港本地好少呢啲網紅呃like情況，自己亦唔會為左拍片而自High，同自己好似無乜關係，但當你同朋輩一齊去進行訓練，身邊嘅訓練拍檔對你嘅吹捧會唔會令你高估自己，加重啲又嚟多兩下呢，突破你嘅Ego(自大/自我)呢，所以一直以嚟我地宣揚嘅科學健身或者大家稱之為健身嘅科學，其實都係為左令大家更加了解自己嘅能力，好好去計算自己嘅成長進步避免出現無謂傷患，長做長有．」
話返轉頭，其實咩運動都有受傷嘅風險，所以大家緊記量力而為！亦唔需要因為咁而唔敢去推胸/大重量，只要根據自己嘅program同身體狀況/能力加上唔好高估自己就可以大大減少訓練時受傷嘅風險！
唔知你地又點睇呢件事呢？
圖片來源：
@ryancrowley97 (Instagram)
@larrywheels (Instagram)
(相關影片可以喺@larrywheels睇到）
請自行衡量是否觀看
圖/文：Hugo
#kofgym #strength #肌肉 #力量 #胸 #推胸 #意外 #效果 #硬拉 #健力 #增肌 #健美 #KOL #眾籌
Search